Descrizione
Un Cumuni cumpòstu da dui ‘iddhi, una illu muntìgghju e una illa custéra, allonga vinti chilometri da Tarranóa, in Gaddhura, illa palti di la Saldìgna pòsta tra Tramuntàna e Liànti. Li dui centri prinzippali si sò fulmàti da cussògghji minóri e stazzi chi si sò aunìti insèmbi in un unicu lócu.Lu paeséddhu di Lóiri e la ‘iddha di la marina di Pòltu Santu Pàulu folmani un Cumuni unicu da lu 1979, insèmbi a un trappéddhu di fraziòni infussàti illu ‘èldi mediterraneu. A datti lu ben’arriàtu a la ‘ntrata di Lóiri è un àlburu maistosu d’ulìa secculari.
Lu sittu undi s’agatta lu cumuni conta tremilia e 500 abitanti e nasci in mezu a muntìgghji bassi, a guàsi 15 chilometri da lu mari. Lu paiséddhu di la marina invecci, à umbè di casi pa’ li stragni chi vènini in féri, umbè di silvìzi e un poltu turisticu mudernu, conta, illu statiàli, 15 milia passòni. Chici, una fòla faci contu chi ill’antichitài arriési da lu mari l’apostulu Pàulu, primma di ritirassi com’e eremita illa Gaddhura più prufunda. Lóiri Pòltu Santu Pàulu, s’agàtta a mitài camìnu tra Tarranóa e Santu Diadòru e insèmbi a iddhi à 15 milia ettari di mari e 40 chilometri di costa di l’area marina di Capo Coda Cavallo. Lu sìmbulu di lu litorali è Cala Ghjilgólu, chi risplendi pa’ lu blu di lu mari, rena in culóri d’ocra ruia e, pa’ lu più, pa’ la rocca di granittu famósa a folma di cuppulàta - unu di li scóddhi più fotografati di la Saldigna - fruttu di l’erosiòni millenaria di l’agenti atmosferichi. Da Pòltu Santu Pàulu, dugna dì pàltini li balchi per ragghjunghjì li maraìgli di la ’mpunènti Taulàra e di l’ìsuli minóri di Molara, Molarotto, Piana e di li Cavalli. Candu v’è “Una notti in Italia”, lu famosu festival di lu cinema di Taulàra, podarài fà cumpagnia a attori e registi prutagunisti di la rassegna illu trattu da Pòltu Santu Pàulu a l’isula. Altu abboiu di no paldì è la fiera nautica. Tra paesi e cussògghji si contani ottu ghjésgi. Di signalà è la ghjésgia di santa Ghjusta illa fraziòni chi pòlta lu mattessi ‘nnommu, e chi stési lu primmu nucleu medioevali di lu futuru Cumuni. Chi miréta mintóu in Lóiri, la parrocchiali di Santu Nicóla di Bari, caratterizzata da una facciata in pétra granitica a vista e un pultòni mannu alchitraàtu, cu’ un bassurilievu chi à pintàta una scena di la ‘ita di lu santu. A li ghjésgi sò assuziàti li festi patronali, undi canta lu Coro di Loiri: - chissa di santu Nicóla, a fini aùstu, e - di sant’Antoni, a mitài di lu mesi di làmpata.
Li primmi tratti spalti di l’òmu illu territoriu sò di lu Neoliticu. Abbeddhu più fraccuènti stésini lu tempu infattu: in un muntìgghju accultu a Lóiri, s’agàttani ruìni di etài nuragica. Lu tempu infattu, l’òmu no à sigutu cun fraccuenza a sta in chistu sittu in èppica punica-romana, sia chici che illa fraziòni di Enasa.